Maenga'n thil tha a hmu

Bible chuan Nupui hmu chuan thil tha a hmu a ni a ti a, Living Hope Ministry-a kan Accountant hmasa ber, Tv. R. Lalengliana (Maenga) chuan thil tha a hmu a ni.

Tv. Maenga hi kum 2006 tawp lam vel atang khan World Vision India-ah hna a hmuh avangin Tripura lamah a hna thawhlai kalsanin min liam san a, tun thlengin chu lamah chuan a bur ta ngar ngar mai a. Aizawl a lo haw chang chuan Living Hope Office tlawh lovin a awm ngai meuh lo. Tun tuma a lo haw erawh min rawn hre chang dawn tawh lo emaw kan ti a, thil tha a hmu tlat a!! Mahse Special Invitation Card kengin a duh tak, a nupui tur Venghlui nula Lalrinfeli, Tripura-a Missionary thawklai nen an rawn lang ta hlawl mai a! Anni pahnih hian May 29, 2009 (Friday) chawhnu Dar 2:00-ah Model Veng Biak In hawnga inneih an tum a, kan lawmpui hle a ni. He inneih hmang tur hian kan ha te pawh kan lo tuai hriam tan a ni.

Mazawni'n Pasal Nei

Mission for Social Reforms (MSR) Project Manager Nl. Vanlalzawnpuii chuan May 21, 2009 chawhnu dar 2:00 khan Aizawl, Electric Vengthlang Kohhran Biak Inah Pasal a nei a, kan lawmpuiin fanau maltluan chawia nupa kawp chawi rem taka an awm kan duhsak hle a ni.

Nl. Mazawni hi Social Work lama tui tak leh mi inhmang peih tak a ni a, a hnaah hian a tui em em a, Media lamah pawh mite hriat a hlawh chho hle a, Pi Vanramchhuangi (Ruatfela Nu) te nen pawh nasa takin an thawkho thin a ni. Tuikual-a MSR Drop In Centre-ah Project Manager hna a thawk mek a, pasal tha tak mai a nei hi a hun lo pawh kan ti tawh chiah lova, kan lawmpui hle a ni.

Benny Lalfakmawia'n Nupui nei dawn

A tlangval lai chuan a riang ngei e, Picnic lai pawha mahni chauha mipui zi nuaih nuaih kara thu thei a ni a, mahse...mahse... riang tur reng a piang a ni hlei lawng e.

Living Hope Ministry-a kan Peer Educator thawklai Tv. Benny Lalfakmawia Chawnpui bialtu chuan March 19, 2009 ni tak hian nupui, a lungdumtu tak chu a nei dawn ta. Benny-a Nupui tur hi HMEICHHIA a ni a, a hming chu R. Lalthlamuani, Pu R. Lalpianthanga Fanu, Chawnpui veng a ni. Presbyterian Kohhran dan thianghlim (Biak In Hawng) in a nei dawn a, Inneih Inkhawm hi Chawnpui Kohhran Biak In ah chawhnu dar 1:00-ah a ni ang. Kan lawmpui hle mai. Outreach pawh a nuam sawt ang a thian ten an ti.