Annual General Meeting (AGM)

Living Hope Ministry Annual General Meeting chuBoard Committee-in April ni 11, 2009 atana a lo ruahman tawh chu remchan lohn awma hriat a nih avangin April 18, 2009 -a neih tura sawn a ni a. A hmun atan Vaivakawn Presbyterian Kohhran General Committee Room a ni ang. He hunah hian Living Hope Member zawng zawngte kim taka tel turin Managing Board Committee chuan an beisei a, tlai-ah Zanriah kilho nghal tura ruahman a ni bawk. Member la ni lo pawhin membership fee pein Living Hope Ministry-ah hian member a nih theih zel a ni.

PE HNARUAK HNAWH KHAT DAWN

Living Hope Ministry hnuaia TI Project thawh mekah Kanan Veng leh Edenthar a Peer Educator hmun ruak hnawhkhat turin Peer Educator pakhat ve ve April 11, 2009 khian lak a ni dawn a. Hemi atan hian heng veng pahnihah te hian vengchhung chanchinbu (YMA & KTP) lamah adverisement chhuah a ni tawh a. Living Hope Office atanga dilna Form lachhuaka dil mai tur a ni. Interview hun chawhma dar 11:00 anga tarlan kha remchan zawkna avangin chawhnu dar 1:00 ah sawn a ni bawk.

Mitthi

Hunthar Venga kan Client C. Lalremruati (38) D/o C. Ngunchunga chu Kalna avangin April 8, 2009 chhun dar 11:00 khan Greenwood Hospital-ah a boral a, a ruang hi anmahni in, Hunthar vengah tlaivarpui a nih hnuah April ni 9 hian vuiliam a ni ang. Living Hope Ministry chuan kan uiin a kalsan a chhungte Pathianin thlamuan se kan duh em em a ni.

TI Evaluation kan hmachhawn

Mizoram SACS hnuaia TI Project la ten April 7, 2009 atang khan TI Evaluation kan hmachhawn tan ta a, keini pawh a hmasa bera Evaluation hi hmachhawn tur zingah kan tel angin April 7, 2009 khan Evaluation team pakhat chuan min rawn evaluate ta a. He team ah hian Dr. Lalthansangi chu team leader niin Nl. Hmingthanpari External Evaluator, Pu. Laldinliana Finance Evaluator leh Pi Betty Lalthantluangi MSACS Observer te an lokal a. Uluk takin kan hna thawh tawh dan an en a, Nikhat ni chuan interview leh document checking in hun an hmang nileng a, Staff te a mal te te in interview an neihpui bakah Stake Holder te pawh group thum lai an kawm a - Police, KTP leh YMA te an kawm a ni. Ni hnihna ah chuan zing chaw ei hma atangin Hotspot ah FGD an nei a, client te nen staff tellovin thil eng eng emaw an sawihova, kan NGO Service chungchang chu an thu khel ber a ni. Ni thum ni hian an thil hmuh hrang hrang atanga khaikhawmna leh report buatsaih nan an hmang thung dawn a ni.

Evaluation-ah hian kan staff ten evaluator te mamawh apiang chhang thei turin an inbuatsaih tha hle a. Kumin hian nikum lam aia hmasawnna kawng tam tamah hmuh a ni a, a lawmawm hle a ni. Evaluator te nen pawh inpawh takin thil kan sawiho thei a, lawmawm kan ti hle.

Annual Reports

Mizoram SACS hnuaia NGO te chuan April 1 & 2, 2009 khan I&PR Auditorium-ah Annual Review Meeting hun hman a ni a. Dr. K. Ropari Project Director, Mizoram SACS chuan hawnna inkhawm hi a kaihruai.

Mizoram Chief Secretary Pu Vanhela Pachuau chu a hawnna inkhawmah khuallian niin a hun takah min tan pui hman a. Chief Secretary hian Mizoram tan tlawmngaia thawktu pawl (NGO) te chu kawng tin renga RINAWM turin min chah a ni. Heng ni hnih chhung hian kum 2008-2009 chhunga NGO hrang hrang te hnathawh dan chu Powerpoint Presentation hmangin Project Director/ Manager ten report an pe a, Living Hope Project Director Upa H. Ronghaka pawhin hemi hunah hian Presentation hun hi a hmang a ni.

Kan Report atanga a lan danin kum 2008-2009 chhung hian kan area chhungah Registered Clients 523 an awm a, chung zinga mi 144 te chu HIV hrik an pai leh pai loh entir turin an thisen test sak an ni a, mi 8 in HIV hrik an pai tih hmuhchhuah a ni a, za zela mi 5.56 in HIV hrik an pai anga chhut a ni. Tin, serh hri kan tih mai (Sexually Transmited Disease) STD vei mi 39 hmuh chhuah an ni a, heng zinga mi 35 te chu kan DIC Clinic-ah damdawi athlawna pein enkawl an ni a, mi 4 dangte erawh chu sorkar enkawlna lama inenkawl tura tirh liam an ni thung.

HIV hrik pai natnain a tlakbuak avanga Damdawiin (Hospice) pan ngaiah tum 20 zet refer an ni bawk a. HIV darh zel tur ven nan Condoms pawh avaiin 47,667 lai tih ral a ni. Heng bakah hian mi 93 zet chu tunhma lama an lo inchiu tawhna avanga antaksa hliam awm enkawl sak an ni.

He Review meeting kharna inkhawma thusawitu Health Minister Pu Lalrinliana Sailo chuan Mizoram Sorkar thar chuan HIV/AIDS venna leh enkawlna kawnga tlawmngai pawl (NGO) thawhpui a chak thu leh an sawrkarin helam hi an ngaih pawimawh tur thu a sawi a, Mizoram Health Care Scheme an duan tharah pawh HIV leh natna khirh tak tak ten Medical Reimbursement an tih ve theih dan tur ruahman an tum thu a sawi lang bawk a ni.

NGO lam atanga thusawitu thenkhat pawhin Mizoram Sorkarin HIV/AIDS hi vei tak takin vei a hun an tih thu an auchhuahpui hlawm a. State Budget-ah te pawh engemaw zat tal dah ve theih tawh nise an tih thu leh an ngaihpawimawh thil eng eng emaw an sawi chhuak a ni.

Project Proposal 2009-2010

Mizoram SACS in an hnuaia Project la zawng zawngte Project Proposal thehlut leh tura min beisei angin keini Living Hope Ministry pawhin kan thehlut ve leh dawn ta a. Tun tumah hian thil tihfel tur tam tak a awm a, kan Budget pawh a hma aia sangin kan han Proposed chhin a, eng tak ang ang i maw?? Mizoram puma NGO ten HIV/AIDS venna atana kan thawh hi Mizo mipuite tan thil hlu leh tangkai tak a ni a, mipui lam pawhin tun aia nasa zawka NGO te tha ti chak tura tan kan lak zel a pawimawh hle a ni. He kan Zoram hi Zoram nuam a siam turin mimal tin ten mawhphurhna kan nei a ni.

Condom Vending Machine Hman theih

Hun engemaw chen Condom Vending Machine a khaihlak hnuin tunah chuan Modified Packet kan siam chawp a, a hma aia lang Quality zawk Condoms chu Vending Machine atangin cheng NGA thir hmangin a lakchhuah leh theih ta. Heng Vending Machine te hi Company Peng Bazar-ah leh Vaivakawn Phurhuai Stand-ah dah anni a, engtik lai pawhin vending theih a ni e.